الاب جان عقيقي توجه بهذه الكلمات المؤثرة من داخل غرفته في مستشفى مار يوسف الدورة بعد اصابته بفيروس الكورونا وكان وضعة الصحي حاياً مستقر بقوة ايمانه بالرب:
الله معي ومعكن، بشكر يسوع دايما لأنو دايما بياخد مبادرتو اتجاهي ليعلمني من كل تجربة وصعوبة كيف استفيد منها لإكبر وانضج بمحبتو، بعد كل تجربة فرح او ألم نفسي او جسدي، دايما بجرب استفيد من طاقة الحب يللي يسوع عاطيني اياها لكون عم جندها بحقل رسالتو، اكيد يللي عشتو بتجربة كورونا من الأمور الصعبة والمرة والمؤلمة لأقصى حدوود ، شو صعب تكون عم تعيش تخبط الموت وحيد انت خايف عاللي بتحبن حواليك خايف تعديهن وهني يللي بحبوك خايفين ينعدو منك من الوباء ، وكأنوا هالآية من الإنجيل ما عم تتطبق "كنت مريضا فما زرتموني"، الأكل والأدوية بينوضعوا عالباب ما بتشوف حدا، كانت تزورني صديقة تهتم فيي تحضرلي ادوية وأكل صحي وكانت بمثابة إم تهتم بولدا تعزيني بمرضي وبوجعي ،مشكلتي انا عندي الربو، مضاعفات الربو خلتني اوصل لكون عم بختنق، شعور بالموت وحيد، لحين اجوا الصليب الاحمر ملايكة الرحمة جابوني عالمستشفى بين الميت والحي، اجمل شعور عشتو بالأمبيلونس ايد عم تحف ع ايدي تقلي ابونا ما تخاف رح تشفى، حسيت حالي مش متروك في حدا مش خايف مني اعديه، عشت عالأوكسيجن ٦ ايام مابقدر آكل ما بقدر شيل الاوكسيجن ابدا ، الحمدالله المرحلة الخطرة مرقت وهلق عم بستعد لكفي حياتي بعد الكورونا الله يشفي جميع المصابين وينجينا من هالوباء بشكر طقم الطبي يللي عم اهتموا فيي وبشكر كل يللي اطمنوا عني وصلولولي بكل بلبنان وبالعالم والله يرد عنكن جميعا .
١٤ نيسان ٢٠٢١ أ. جان عقيقي
من موقع لبنان في استراليا نتمنى الشفاء لجميع المرضى وخاصة للاب الصديق جان عقيقي- بادرو الحجة.
